ISSU NATALI ANCU PIÙ CA l’ALTRI : FETI LU IN FAMIGLIA
« Pocu ghjente, megliu festa » diciani l’anziani. Ma pà certi parsoni, i festi sò una perioda monda difficiuli. Natali è u capu d’anni sò festi famigliali è avvenimenti assumigliati assai à a zitiddina, allora ch’eddi sò quantu impurtanti pà l’anziani. Eppuru, issi mumenti felici ùn sò sparti da tutt’u mondu postu chì, à sapemi, i « seniors » stani di più in più tralasciati in issi periodi.
Un studiu di i « Résidences Services Seniors Domitys » hà mustratu chì 95% di l’anziani diceni ch’una bona festa si passa incù l’altri è sò 86% chì voleni passà Natali in famiglia. Tuttavia, si sà chì u sciffru di l’isulamentu in Francia hè crisciutu assai, ancu di più in a perioda di u COVID, induva hè divintatu guasgi una nurmalità di lascià l’anziani soli (2 millioni in Francia in u 2021 contr’à 900 000 in u 2017).
Allora, chì fà ? I soluzioni pà l’aiutu sò parechji. Ci sò associ ò strutturi chì pruponini attività pà luttà contr’à l’isulamenti cume :
- Priparazioni di ripasti cullettivi u ghjornu di Natali
- Cundutta d’invitati à u ripastu è dopu in casa
- Visiti è spartera d’un ripastu in casa pà l’anziani ch’ùn pudeni ò voleni micca muvà u ghjornu di Natali
Iniziativi cusì parmettani à i nostri anziani isulati di passà una stonda di spartera unica, ricriendu un’ambiu familiari, un rigalu impurtantissimu in una perioda induva a solitudina si faci senta ancu di più.
Fora di quessu, l’Aiutu è a prisenza ferma u travagliu dinò di l’EHPAD, di i residenzi Seniors ò di l’associ cume l’ACPA. I nostri servizii sò quì pà assicurà una leia suciali incù i nostri binifiziarii è saremi quì pà sparghja un mumentu incù i nostri. Ma ramentà ti vi bè : Ùn hè più bedda festa chì quidda passata in famiglia, allora ùn vi sminticheti micca d’invità i vostri à a tolla, di fà li beddi rigali è di passà una bedda stonda insemi.
